Tata Motors Sets Sales Record; Sells Over 60,000 Cars in a Month for First Time in History
ന്യൂഡൽഹി: ടാറ്റ മോട്ടോഴ്‌സ് 2025 സെപ്റ്റംബറിൽ 60,907 പാസഞ്ചർ വാഹനങ്ങൾ വിറ്റഴിച്ചു. കമ്പനിയുടെ ചരിത്രത്തിലെ ഏറ്റവും ഉയർന്ന പ്രതിമാസ വിൽപ്പനയാണിത്. കഴിഞ്ഞ വർഷം ഇതേ മാസത്തെ അപേക്ഷിച്ച് വിൽപ്പനയിൽ 47 ശതമാനത്തിന്റെ വൻ കുതിപ്പാണ് രേഖപ്പെടുത്തിയത്. ജിഎസ്ടി 2.0 നിരക്ക് കുറച്ചതും നവരാത്രി ഉത്സവകാലത്തെ ആവശ്യകതയുമാണ് ഈ റെക്കോർഡ് വളർച്ചയ്ക്ക് കാരണമായത്.
ഇലക്ട്രിക് വാഹനങ്ങളുടെ (ഇവി) വിൽപ്പന 96 ശതമാനം വർധിച്ച് 9,191 യൂണിറ്റുകളായി. സിഎൻജി വാഹനങ്ങളുടെ വിൽപ്പന 105 ശതമാനം ഉയർന്ന് 17,800 യൂണിറ്റുകളിലെത്തി. ജനപ്രിയ മോഡലായ നെക്‌സോണിന്റെ 22,500 യൂണിറ്റുകൾ വിറ്റഴിഞ്ഞു എന്നത് ശ്രദ്ധേയമാണ്. ഹാരിയർ, സഫാരി, പഞ്ച് തുടങ്ങിയ മോഡലുകൾക്കും മികച്ച പ്രതികരണമാണ് വിപണിയിൽ നിന്ന് ലഭിച്ചത്.
വാണിജ്യ വാഹന വിഭാഗം വിഭജിക്കുന്നു
ടാറ്റ മോട്ടോഴ്‌സ് തങ്ങളുടെ വാണിജ്യ വാഹന വിഭാഗം (Commercial Vehicle division) വിഭജിക്കുന്നതിനുള്ള (Demerger) റെക്കോർഡ് തീയതിയായി ഒക്ടോബർ 14 പ്രഖ്യാപിച്ചു. ഈ തീയതിക്ക് മുൻപ് ടാറ്റ മോട്ടോഴ്‌സിന്റെ ഓഹരികൾ കൈവശമുള്ള ഓഹരി ഉടമകൾക്ക്, ഓരോ ഓഹരിക്കും പകരമായി ടിഎംഎൽ കൊമേഴ്‌സ്യൽ വെഹിക്കിൾസ് ലിമിറ്റഡിന്റെ (TMLCVL) ഒരു ഓഹരി സൗജന്യമായി ലഭിക്കും. വിഭജന നടപടികൾ 2025 ഒക്ടോബർ 1 മുതൽ പ്രാബല്യത്തിൽ വന്നു. ടിഎംഎൽ കൊമേഴ്‌സ്യൽ വെഹിക്കിൾസ് ലിമിറ്റഡിന്റെ ഓഹരികൾ ഉടൻ തന്നെ ബിഎസ്ഇയിലും എൻഎസ്ഇയിലും ലിസ്റ്റ് ചെയ്യും.
മാരുതിക്കും ഹ്യുണ്ടായിക്കും മികച്ച വിൽപ്പന
കഴിഞ്ഞ മാസം മാരുതി സുസുക്കി 1,89,665 വാഹനങ്ങൾ വിറ്റഴിച്ചു. മുൻ വർഷത്തെ അപേക്ഷിച്ച് 3 ശതമാനം വളർച്ചയാണ് കമ്പനി നേടിയത്. കയറ്റുമതി 42,204 യൂണിറ്റായി ഉയർന്നു. അതേസമയം, ഹ്യുണ്ടായ് സെപ്റ്റംബറിൽ 70,347 യൂണിറ്റുകളുടെ വിൽപ്പനയിലൂടെ 10 ശതമാനം വളർച്ച കൈവരിച്ചു.
About the Author
