India Warns Pakistan: "Remember, One Route to Karachi Passes Through Sir Creek
ന്യൂഡൽഹി: ഒരു ദുസ്സാഹസത്തിന് മുതിർന്നാൽ ചരിത്രവും ഭൂമിശാസ്ത്രവും മാറ്റിയെഴുതുമെന്ന് പാകിസ്ഥാന് ശക്തമായ താക്കീത് നൽകി പ്രതിരോധ മന്ത്രി രാജ്‌നാഥ് സിംഗ്. ഗുജറാത്തിലെ സർ ക്രീക്ക് മേഖലയിൽ പാകിസ്ഥാൻ അടുത്തിടെ സൈനിക സന്നാഹങ്ങൾ വർധിപ്പിച്ച സാഹചര്യത്തിലായിരുന്നു പ്രതിരോധ മന്ത്രിയുടെ ഈ മുന്നറിയിപ്പ്. വിജയദശമി ദിനത്തിലെ ശസ്ത്രപൂജ ചടങ്ങിൽ സംസാരിക്കുകയായിരുന്നു അദ്ദേഹം.
“സർ ക്രീക്കിലെ അതിർത്തി തർക്കം പാകിസ്ഥാൻ മനഃപൂർവം ആളിക്കത്തിക്കുകയാണ്. അവരുടെ ഉദ്ദേശ്യം നല്ലതല്ല. ചർച്ചകളിലൂടെ പ്രശ്നം പരിഹരിക്കാൻ ഇന്ത്യ ഒരുപാട് തവണ ശ്രമിച്ചു. എന്നാൽ അതിനോട് സഹകരിക്കാതെ, സർ ക്രീക്കിനോട് ചേർന്നുള്ള പ്രദേശങ്ങളിൽ പാകിസ്ഥാൻ സൈനിക സന്നാഹങ്ങൾ കൂട്ടുന്നത് ഞങ്ങൾ കാണുന്നുണ്ട്,” രാജ്‌നാഥ് സിംഗ് പറഞ്ഞു.
ഗുജറാത്ത് തീരത്തെ തന്ത്രപ്രധാനമായ ചതുപ്പുനിലമാണ് സർ ക്രീക്ക്. ഈ മേഖലയുടെ ഉടമസ്ഥതയെച്ചൊല്ലി ഇന്ത്യയും പാകിസ്ഥാനും തമ്മിൽ ദീർഘകാലമായി തർക്കം നിലനിൽക്കുന്നുണ്ട്.
‘കറാച്ചിയിലേക്കുള്ള വഴി ക്രീക്കിലൂടെ’
1965-ലെ യുദ്ധം പാകിസ്ഥാൻ മറക്കരുതെന്ന് അദ്ദേഹം ഓർമ്മിപ്പിച്ചു. “അന്ന് ലാഹോർ വരെ ഇന്ത്യൻ സൈന്യം എത്തി. ഇന്ന്, കറാച്ചിയിലേക്കുള്ള ഒരു വഴി സർ ക്രീക്കിലൂടെയാണെന്ന് അവർ ഓർക്കുന്നത് നല്ലതാണ്,” അദ്ദേഹം മുന്നറിയിപ്പ് നൽകി. ഇന്ത്യൻ സൈന്യവും ബിഎസ്എഫും എന്തിനും തയ്യാറായി അതിർത്തി കാക്കുകയാണെന്നും അദ്ദേഹം കൂട്ടിച്ചേർത്തു.
‘ഓപ്പറേഷൻ സിന്ദൂർ’ ഓർമ്മിപ്പിച്ച് മന്ത്രി
ഗുജറാത്തിലെ ഭുജിൽ സൈനികരുമായി സംസാരിക്കുമ്പോഴും പാകിസ്ഥാന്റെ പഴയകാല നീക്കങ്ങളെക്കുറിച്ച് അദ്ദേഹം ഓർമ്മിപ്പിച്ചു. “‘ഓപ്പറേഷൻ സിന്ദൂർ’ കാലത്ത് ലേ മുതൽ സർ ക്രീക്ക് വരെ ഇന്ത്യയുടെ പ്രതിരോധം ഭേദിക്കാൻ പാകിസ്ഥാൻ ശ്രമിച്ചു, പക്ഷെ നടന്നില്ല. ഇന്ത്യയുടെ തിരിച്ചടിയിൽ പാകിസ്ഥാന്റെ വ്യോമ പ്രതിരോധം തകർന്നു. എവിടെയും എപ്പോഴും ശത്രുവിന് കനത്ത നാശം വിതയ്ക്കാൻ ഇന്ത്യക്കാവുമെന്ന് ലോകം അന്ന് കണ്ടു,” അദ്ദേഹം പറഞ്ഞു.
About the Author
